Ceti concors que regârde los difèrents nivéls des ècoules est lo paralèlo savoyârd du Concors Cerlogne de la Vâl d’Aoûta. Y at asse-ben na vèrsion piemontêsa (concors EFFEPI). D’ense ècoules, coléjos et possiblament licês aprèstont durent la sêson d’ècoula un travâly de rechèrche ou na ficcion sur un tèmo comon. Ceti an il s’agéssêt des sonjos, des étres envisiblos et des rècits fantasticos.
L’encontra des difèrents participents savoyârds s’est tenua a l’ôditorion de Chavanôd, de-coute Ènneci, demârs 17 de mê. Châque cllâsse presentâve yena ou plusiors scènes. U nivél èlèmentèro ant participâ l’ècoula de la Chapèla-Rambôd (cllâsse unica) et l’ècoula d’Èxcenevê-Èvouère (cllâsses de Mmes Gobber et Treboux). Por lo segondèro los doux coléjos de Bouèjo et Sant-Jouère ant participâ châcun en bloque, sen distinccion de cllâsses. Un licêen at presentâ un tèxto.
Los premiérs prix ant étâ acordâs a la cllâsse de Mma Treboux et u coléjo de Bouèjo. Lo chouèx at pas étâ ésiê, tôs aviant fêt des èforts de grant mèrito, d’ense d’ôtros prix (règie, tradicion, émaginacion) ant étâ atribuâs.
Quintes remârques d’ôrdre gènèral on pôt fâre ? D’abôrd que la mèmorisacion des rebreques ére des côps dificila, mas des èlèvos malâdos ant dû étre remplaciês per d’ôtros u dèrriér moment. U nivél de la lengoua on at remarcâ des dificultâts por cèrtins jouenos de ben placiér l’accent tonico. Sêt la finala atona ére oublâye, sêt arriér-més l’accent ére placiê sur ceta-ce.
Cen dit, fôt fèlicitar tôs los participents, èlèvos, règents, entèrvenents patouesans et parents. On pôt èsperar qu’avouéc la tota frèche recognessence de noutra lengoua per l’èducacion nacionâla, més d’èlèvos porront étre regardâs, avouéc un temps més important dèdiê a la lengoua.
Adonc grant-marci a tôs, y comprês a la municipalitât de Chavanôd, por ceta franc bèla jornâ, et a l’an que vint.
🖊 Alen FAVRO, prèsident du juri
Laisser un commentaire